បញ្ហាក្ដៅគគុកមួយដែលកំពុងតែកើតឡើងស្ទើរតែរៀងរាល់ថ្ងៃ គឺការបន្លំ ឬក៏លួចយកតួអង្គ (Hero) ទៅវិញទៅមករវាងអ្នកកម្សាន្ត និងអ្នកកម្សាន្តគ្នាឯង ក្នុងសេវាកម្សាន្តអនឡាញដូចជា JX II , AK Online និង Avatar ជាដើម។ ដើម្បីជៀសវាងបញ្ហាទាំងអស់នេះ Sabay ធ្វើការបង្ហាញពីវិធីការពារពីការបន្លំយក Account និង Hero មួយចំនួន ដល់អ្នកកម្សាន្តទាំងអស់ ដើម្បីការពារ Hero ឬក៏ Account របស់ខ្លួន ។ តើវីធីទាំងនោះមានអ្វីខ្លះទៅ ?
វិធីទី ១ នៅពេលដែលអ្នកកម្សាន្តទាំងអស់គ្នាចង់ដោះដូរ Account និងItem ផ្សេងៗ ក្នុងសេវាកម្សាន្តណាមួយ ពីអ្នកកម្សាន្តណាម្នាក់ដែលខ្លួនមិនធ្លាប់ស្គាល់ សូមធ្វើការតាមដាន Account របស់អ្នកដែលយើងចង់ដោះដូរ Item នោះឲ្យបានច្បាស់ ដោយធ្វើការសាកសួរពីព័ត៌មាន Account នោះតាមរយៈក្រុមការងារ Sabay ថាតើ Account ដែលយើងចង់ដោះដូរនោះ ធ្លាប់ Lock Account ម្ដងហើយឬនៅ ?
ចំណែកឯវិធីទី ២ វិញ ជៀសវាងប្រគល់ Account ព្រមទាំងលេខសំងាត់ Account របស់ខ្លួនឲ្យទៅអ្នកកម្សាន្តខិលខូចមួយចំនួន ដែលបានប្រកាសក្នុងសេវាកម្សាន្តថា ពួកគេអាចធ្វើការ Copy Gold និង item ក្នុងសេវាកម្សាន្ត JX ឬក៏ Avatar និងធ្វើកាំភ្លើង AK Forever ក្នុងសេវាកម្សាន្ត AK Online ប៉ុន្តែតម្រូវឲ្យអ្នកកម្សាន្តប្រគល់ឈ្មោះ Account និងលេខសំងាត់ទៅឲ្យពួកគេ ដើម្បី Copy Item ផ្សេងៗ។ អ្វីទាំងអស់នេះ ជាការបោកប្រាស់របស់អ្នកខិលខូចនោះទេ ។ វិធីទី ៣ សម្រាប់សេវាកម្សាន្ត Avatar ដើម្បីជៀសវាងបញ្ហាទាំងនេះ សូមអ្នកកម្សាន្តធ្វើការ Link Service ជាមួយ Sabay Account ។ ចំពោះលេខសំងាត់ ដែលត្រូវប្រើក្នុងសេវាកម្សាន្តផ្សេងៗ និងលេខសំងាត់ប្រើសម្រាប់ផ្ទេរ Sabay Coin សូមឲ្យអ្នកកម្សាន្តទាំងអស់ដាក់លេខសំងាត់ឲ្យខុសៗគ្នា ជៀសវាងការដាក់លេខសំងាត់ដូចគ្នាទាំងអស់។
ងាកមករកវិធីទី ៤ វិញ គឺសំដៅទៅលើការដាក់លេខសំងាត់ផ្សេងៗ ការដាក់លេខសំងាត់ អ្នកកម្សាន្តគួរតែជៀសវាងការលេខសំងាត់ដែលពាក់ព័ន្ធនឹងព័ត៌មានផ្ទាល់ខ្លួនដូចជា ៖ ការដាក់លេខសំងាត់ដូចលេខទូរស័ព្ទ ថ្ងៃខែឆ្នាំកំណើត និងឈ្មោះរបស់ខ្លួន ឬក៏ឈ្មោះអ្នកជាទីស្រលាញ់របស់ខ្លួន។ ប្រការទាំងនេះ ការពារពីមនុស្សដែលនៅក្បែរខ្លួនយើង ដែលដឹងព័ត៌មានអំពីខ្លួនយើងធ្វើការរាវយកលេខសំងាត់របស់យើង ដើម្បីយក Account របស់យើងទៅប្រើប្រាស់។
បញ្ហាបាត់តួអង្គ ( Hero ) និង Account នេះ គឺកើតឡើងមកពីអ្នកកម្សាន្តប្រាប់លេខសំងាត់នៃ Account របស់ខ្លួនទៅអ្នកដ៏ទៃ ។ បកស្រាយលើបញ្ហានេះ ក្រុមការងារសេវាកម្សាន្តរបស់ Sabay ទាំងអស់ មិនទទួលខុសត្រូវចំពោះអ្នកកម្សាន្តណាដែលបាត់ Account ឬក៏បាត់ Hero របស់ខ្លួននោះទេ ក្នុងករណីដែលអ្នកកម្សាន្តធ្វើការប្រគល់លេខសំងាត់ និង Account របស់ខ្លួនទៅឲ្យអ្នកដ៏ទៃទៀត ដើម្បីធ្វើការដោះដូរ និងឲ្យគេប្រើប្រាស់ Hack Tool ក្នុងបំណងទទួលបាន Item ផ្សេងៗ។ បន្ថែមពីនេះ AK Online មិនមានការដាក់លក់កាំភ្លើង AK Forever នោះទេ ដូច្នេះសូមអ្នកកម្សាន្តទាំងអស់កុំជឿលើជនខិលខូចមួយក្តាប់តូចនោះឲ្យសោះ៕
